ന്യൂഡല്ഹി: വനിതാ സംവരണ ഭേദഗതി ബില്ലിൽ സ്വീകരിക്കേണ്ട നിലപാട് ചർച്ച ചെയ്യാൻ പ്രതിപക്ഷ പാർട്ടികളുടെ യോഗം അല്പസമയത്തിനകം ആരംഭിക്കും. കോൺഗ്രസ് അധ്യക്ഷൻ മല്ലികാർജുൻ ഖാർഗയുടെ നേതൃത്വത്തിലാണ് യോഗം.
പ്രത്യേക പാര്ലമെന്റ് സമ്മേളനം നാളെയാണ് ആരംഭിക്കുന്നത്. ലോക്സഭ സീറ്റുകളുടെ എണ്ണം 850 ആക്കി വനിതാ സംവരണം നടപ്പിലാക്കാനാണ് ബില്ലിനെ പ്രധാന ശുപാര്ശ.
മണ്ഡല പുനര് നിര്ണയം തിരക്കിട്ട് നടത്തുന്നതിനോട് യോജിപ്പില്ലെന്നാണ് പ്രതിപക്ഷത്തിന്റെ നിലപാട്. വനിതാ ബില്ലിനു പുറമെ, അതിര്ത്തി നിര്ണ്ണയത്തിനുള്ള കേന്ദ്രസര്ക്കാര് നീക്കവും യോഗത്തില് ചര്ച്ചയാകും.
സ്ത്രീ സംവരണം, ദേശീയ അതിര്ത്തി നിര്ണ്ണയം, ലോക്സഭയിലെ സീറ്റുകളുടെ വര്ദ്ധനവ് എന്നിങ്ങനെ മൂന്ന് വ്യത്യസ്ത വിഷയങ്ങളെ, ജനങ്ങളുടെ മനസ്സില് ആശയക്കുഴപ്പം സൃഷ്ടിക്കുന്നതിനായി കേന്ദ്രസര്ക്കാര് മനപ്പൂര്വ്വം കൂട്ടിക്കലര്ത്തുകയാണെന്ന് പ്രതിപക്ഷ നേതാക്കള് ആരോപിച്ചു.ലോക്സഭ സീറ്റുകളുടെ എണ്ണം വര്ദ്ധിപ്പിക്കുന്നതിനുള്ള നടപടിയെ ‘ഭരണഘടനയ്ക്കെതിരായ ആക്രമണം’ എന്നാണ് സോണിയാഗാന്ധി വിശേഷിപ്പിച്ചത്.
