അഡ്ലെയ്ഡ്: ഓസ്ട്രേലിയക്കെതിരായ ഏകദിന പരമ്പരയിൽ വിരാട് കോഹ്ലി തുടർച്ചയായി രണ്ടാമത്തെ മത്സരത്തിലും പൂജ്യത്തിന് (ഡക്ക്) പുറത്തായതിന് പിന്നാലെ പ്രതികരണവുമായി മുൻ ഇന്ത്യൻ പരിശീലകൻ രവി ശാസ്ത്രി. 2027 ഏകദിന ലോകകപ്പ് കോഹ്ലിയെ സംബന്ധിച്ചിടത്തോളം ‘വളരെ അകലെയാണ്’ എന്നും, അദ്ദേഹം ഉടൻ തന്നെ മികച്ച ഫോം കണ്ടെത്തേണ്ടതുണ്ടെന്നും ശാസ്ത്രി വ്യക്തമാക്കി.
പരിശീലകനും ക്യാപ്റ്റനുമായി ശാസ്ത്രിയും കോഹ്ലിയും ഇന്ത്യൻ ക്രിക്കറ്റിനെ നയിച്ച കാലയളവിൽ ടീം ഫിറ്റ്നസിലും പേസ് ബൗളിങ്ങിലും വലിയ കുതിച്ചുചാട്ടം നടത്തിയിരുന്നു. അതുകൊണ്ട് തന്നെ കോഹ്ലിയുടെ മാനസികാവസ്ഥയെ അടുത്തറിയുന്ന വ്യക്തിയാണ് ശാസ്ത്രി.
തുടർച്ചയായ ‘ഡക്ക്’: ഞെട്ടിച്ച് കോഹ്ലി
ഓസ്ട്രേലിയക്കെതിരായ രണ്ടാം ഏകദിനത്തിൽ കോഹ്ലി പൂജ്യത്തിന് പുറത്തായതോടെ താരത്തിൻ്റെ ഏകദിന കരിയറിൽ ആദ്യമായിട്ടാണ് തുടർച്ചയായ രണ്ട് മത്സരങ്ങളിൽ ‘ഡക്ക്’ നേടുന്നത്. പെർത്തിൽ നടന്ന ആദ്യ മത്സരത്തിൽ എട്ട് പന്തിൽ പൂജ്യത്തിന് പുറത്തായ കോഹ്ലി, തൻ്റെ ഇഷ്ട ഗ്രൗണ്ടുകളിലൊന്നായ അഡ്ലെയ്ഡ് ഓവലിൽ നടന്ന രണ്ടാം ഏകദിനത്തിൽ ഭാഗ്യം തിരുത്തിക്കുറിക്കാൻ കഴിയുമെന്ന പ്രതീക്ഷയിലായിരുന്നു. എന്നാൽ യുവതാരം സേവ്യർ ബാർട്ട്ലെറ്റിൻ്റെ പന്തിൽ പുറത്തായി കോഹ്ലിയുടെ ഈ മോശം പ്രകടനം തുടർന്നു.
‘അഡ്ലെയ്ഡ് ഓവലിൽ നിശബ്ദത തളംകെട്ടി,’ കോഹ്ലിയുടെ പുറത്താകലിനെക്കുറിച്ച് റിപ്പോർട്ടുകൾ പറയുന്നു. ഈ വേദിയിൽ കോഹ്ലിയുടെ അവസാനത്തെ ഏകദിന പ്രകടനമായിരിക്കാനാണ് സാധ്യതയെന്നും വിലയിരുത്തപ്പെടുന്നു.
ഫോം വേഗത്തിൽ കണ്ടെത്തണം
തുടർച്ചയായ ഈ പരാജയങ്ങൾക്ക് പിന്നാലെയാണ് രവി ശാസ്ത്രിയുടെ മുന്നറിയിപ്പ്. ‘അദ്ദേഹം എത്രയും പെട്ടെന്ന് ഫോം വീണ്ടെടുക്കേണ്ടതുണ്ട്. ഇന്ത്യയുടെ വൈറ്റ്-ബോൾ ക്രിക്കറ്റിൽ സ്ഥാനത്തിനായി കടുത്ത മത്സരമാണ് നടക്കുന്നത്. വിരാട് ആയാലും രോഹിത് ആയാലും ടീമിലെ മറ്റാരെങ്കിലുമായാലും ആർക്കും വിശ്രമിക്കാൻ കഴിയില്ല. ഇത് അത്ര എളുപ്പമുള്ള കാര്യമല്ല, മത്സരം ശക്തമാണ്,’ ഫോക്സ് സ്പോർട്സിനോട് സംസാരിക്കവെ ശാസ്ത്രി പറഞ്ഞു.
‘ഇന്നും അദ്ദേഹം പരാജയപ്പെട്ടു. അദ്ദേഹത്തിന്റെ കാൽ ചലനങ്ങളിൽ അൽപം ധൃതിയുണ്ടായിരുന്നു. അദ്ദേഹത്തിന്റെ ഏകദിന റെക്കോർഡ് അസാധാരണമാണ്, അതിനാൽ തുടർച്ചയായി രണ്ട് ‘ഡക്ക്’ നേടുന്നത് അദ്ദേഹത്തെ നിരാശനാക്കും,’ ശാസ്ത്രി കൂട്ടിച്ചേർത്തു.
കോഹ്ലിയുടെ ഈ മോശം പ്രകടനം ഇന്ത്യൻ ടീം മാനേജ്മെൻ്റിന് തലവേദന സൃഷ്ടിച്ചിട്ടുണ്ട്. വൈറ്റ്-ബോൾ ക്രിക്കറ്റിൽ കൂടുതൽ സ്ഥിരതയാർന്ന യുവതാരങ്ങൾ വരാനിരിക്കെ, കോഹ്ലിയുടെ തിരിച്ചുവരവ് ആരാധകർ ആകാംഷയോടെയാണ് കാത്തിരിക്കുന്നത്.
