സംസ്ഥാനത്തെ എംഎല്‍എമാരുടെ ശമ്പളവും ആനൂകൂല്യങ്ങളും വര്‍ധിപ്പിക്കാനൊരുങ്ങി സര്‍ക്കാര്‍. വിഷയം നാളത്തെ മന്ത്രിസഭാ യോഗത്തില്‍ പരിഗണിച്ചേക്കും. ശമ്പളം വര്‍ധിപ്പിക്കാനുള്ള നിര്‍ദേശം പാര്‍ലമെന്ററി കാര്യവകുപ്പ് മന്ത്രി യോഗത്തില്‍ അവതരിപ്പിക്കും. ശമ്പളം വര്‍ധിപ്പിക്കണമെന്ന ആവശ്യം ഉയര്‍ന്നുവന്നിട്ടുണ്ടെന്ന് മന്ത്രി സണ്ണി ജോസഫ് പ്രതികരിച്ചു. 2018-ലാണ് അവസാനമായി ശമ്പളം വര്‍ധിപ്പിച്ചതെന്നും വിഷയത്തില്‍ കമ്മിറ്റിയുടെ റിപ്പോര്‍ട്ട് വന്നതിന് ശേഷം തുടര്‍ തീരുമാനമെന്നും മന്ത്രി പറഞ്ഞു.
എട്ട് വര്‍ഷത്തിന് ശേഷമാണ് എംഎല്‍എമാരുടെ ശമ്പളവും ആനുകൂല്യങ്ങളും വര്‍ധിപ്പിക്കാന്‍ സര്‍ക്കാര്‍ ആലോചിക്കുന്നത്. ജീവിതച്ചെലവ്, വിലക്കയറ്റം, പെട്രോള്‍-ഡീസല്‍ വില വര്‍ധനവ്, എംഎല്‍എമാരുടെ ജോലിഭാരം എന്നിവ കണക്കിലെടുത്താണ് ഈ നീക്കമെന്നും മന്ത്രി സണ്ണി ജോസഫ് പറഞ്ഞു. നിലവില്‍ മണ്ഡലം അലവന്‍സ്(25,000), ടെലിഫോണ്‍ അലവന്‍സ്(11,000), ഇന്‍ഫര്‍മേഷന്‍ അലവന്‍സ്(4,000) തുടങ്ങിയ വിവിധ അലവന്‍സുകളാണ് എംഎല്‍എമാര്‍ക്കുള്ളത്. ഇതില്‍ മാറ്റങ്ങള്‍ വരുത്താനാണ് ആലോചന. നാളെത്തെ മന്ത്രിസഭാ യോഗത്തിന് മുന്‍പുള്ള പ്രധാനപ്പെട്ട അജണ്ടകളിലൊന്ന് എംഎല്‍എമാരുടെ ശമ്പള വര്‍ധനവായിരിക്കുമെന്നാണ് റിപ്പോര്‍ട്ടുകള്‍.
