ഹൈദരാബാദ്: ആന്ധ്രാപ്രദേശ് ഉപമുഖ്യമന്ത്രി പവൻ കല്യാൺ, മെഗാസ്‌റ്റാർ ചിരഞ്ജീവി, നടൻ രാം ചരൺ എന്നിവരുമായി കേന്ദ്ര ആഭ്യന്തര മന്ത്രി അമിത് ഷാ ഹൈദരാബാദിലെ ഹോട്ടൽ കാകതിയയിൽ കൂടിക്കാഴ്‌ച നടത്തി. ഇതോടെ സംസ്ഥാനത്തെ രാഷ്ട്രീയ, ചലച്ചിത്ര വൃത്തങ്ങൾ ആവേശത്തിലാണ്. അമിത് ഷാ ഹൈദരാബാദിൽ എത്തിയതിന് പിന്നാലെ വിവിധ കൂടിക്കാഴ്‌ചകൾ നടത്തുന്നുണ്ട്.
ബിജെപിയുടെ നേതൃത്വത്തിൽ നടക്കുന്ന മഹാ പദയാത്രയിൽ പങ്കെടുക്കാനാണ് അമിത് ഷാ ഹൈദരാബാദിലെത്തിയത്. ചാർമിനാർ ഭാഗ്യലക്ഷ്‌മി ക്ഷേത്രത്തിൽ അദ്ദേഹം പ്രത്യേക പൂജകൾ നടത്തിയിരുന്നു. കാകതീയ ഹോട്ടലിൽ നിരവധി പ്രമുഖർക്കൊപ്പം അദ്ദേഹം ഉച്ചഭക്ഷണ സമ്മേളനം സംഘടിപ്പിക്കുകയായിരുന്നു. ഉപമുഖ്യമന്ത്രി പവൻ, ചിരഞ്ജീവി, രാം ചരൺ എന്നിവരെയും ക്ഷണിച്ചു.
മുമ്പ്, ആർആർആറിലെ നാട്ടു നാട്ടു എന്ന ഗാനത്തിന് ഓസ്‌കാർ നേടിയതിന് ശേഷം ചിരഞ്ജീവിയും രാം ചരണും ഡൽഹിയിൽ വച്ച് അമിത് ഷായെ നേരിട്ട് കണ്ടിരുന്നു. ഹൈദരാബാദിൽ വച്ചാണ് അമിത് ഷാ ജൂനിയർ എൻടിആറിനെ കണ്ടത്. ഇപ്പോഴിതാ, ചിരഞ്ജീവി, പവൻ എന്നിവരോടൊപ്പം രാം ചരണുമായി അമിത് ഷാ കൂടിക്കാഴ്‌ച നടത്തുമെന്ന വിവരം ഭാവി രാഷ്ട്രീയ തന്ത്രങ്ങളിൽ നിർണായകമായി കണക്കാക്കപ്പെടുന്നു.
പ്രധാനമന്ത്രി മോദിയും ചിരഞ്ജീവിയോട് പല അവസരങ്ങളിലും പ്രത്യേക താൽപര്യം പ്രകടിപ്പിച്ചിട്ടുണ്ട്. പ്രധാനമന്ത്രി മോദിയോടും അമിത് ഷായോടും ഉള്ള ബഹുമാനവും പവൻ പല അവസരങ്ങളിലും പ്രകടിപ്പിച്ചിട്ടുണ്ട്. ആന്ധ്രയിൽ എൻഡിഎയിൽ ബിജെപിയും ജനസേനയും ഒന്നിച്ചാണെങ്കിലും തെലങ്കാനയിൽ രാഷ്ട്രീയമായി വേർപിരിയുകയാണ്. വരാനിരിക്കുന്ന എംഎൽസി തിരഞ്ഞെടുപ്പിനും ഇവർ വെവ്വേറെ ചേരികളിലാണ്.
ദക്ഷിണേന്ത്യയിൽ വേരുറപ്പിക്കാൻ ശ്രമിക്കുന്ന ബിജെപിയെ സംബന്ധിച്ച് ഏറെ നിർണായകമായ ഇടമാണ് ആന്ധ്രാപ്രദേശ്. രണ്ട് തെലുഗു സംസ്ഥാനങ്ങളിലും കരുത്ത് തെളിയിക്കാൻ അവിടുത്തെ പ്രധാന കക്ഷികളെയും പ്രമുഖരെയും ഒപ്പം നിർത്തുകയാണോ ബിജെപി ശ്രമമെന്നാണ് പലരും ചോദിക്കുന്ന ചോദ്യം. എന്നാൽ കൂടിക്കാഴ്‌ചയെ പൂർണമായി രാഷ്ട്രീയവത്കരിക്കുന്നതിൽ അർത്ഥമില്ലെന്നാണ് ഒരു വിഭാഗത്തിന്റെ അഭിപ്രായം.
